أكورا بريس بقلم: لبنى أحمد الجود
قالك علاش عبد اللطيف الحموشي ما يمشيش يجيب البراءة ديالو من فرنسا على أساس تهم النصاب ديال زكرياء مومني، كيف دار الدليمي فاش إتهموه بقتل المهدي بنبركة !!
سؤال :
- آش جاب شي لشي و آش جاب حمو لعلي … أيها العجوز الخرف ؟
شنو وجه المقارنة أولا وقبل كل شيء، بين المهدي بنبركة (عريس الشهداء ) و بين نصاب بانضي كان كيقلب على الهمزة و تفرش ؟
واش تسطيتي ؟
واش حماقيتي ؟
واش ضربك الله ؟
بنبركة اللي تقتل و اللي مزال مكاينش القبر ديالو تقارنو ليا مع صالوبار من درجة شفار ؟!
ولكن كنرجع و نقول بأن اللي معندو إيديولوجيا حاكماه و معندو علاقة لا باليسار و لا باليمين عادي يطلق فالمقارنات المهينة و العبثية !!
و خاص ضروووري تخرج عائلة شهيد الأمة ، المهدي بنبركة ، بموقف من هاد المقارنة الشنيعة و المهينة لذاكرة المناضل الإتحادي الفذ و الوطني !
هادي أولا
ثانيا :
عبد اللطيف الحموشي راه جاب البراءة ديالو من عند السلطات الفرنسية ، فخبارك أ سي زيان و لا لا ؟
بتاريخ 19 يوليوز 2016 ، قضت السلطات الفرنسية ببطلان دعوة المومني لعدم توفر أدلة !!
و توكض شي شوية و جيب لخبار الصحاح باش ما تبانش مينابل !
في حين يشيد ملك البلاد بمجهودات المؤسسة الأمنية و القائمين عليها ، يأتي زيان و شرذمته ليضربوا في مصداقية رجل مسؤول ، يحبه المغاربة و يثقون به !!
عمرو حكر شي مواطن !
عمر شي شكاية تحطات ضد رجل أمن ما تنظرش فيها و ما تفتحش فيها تحقيق !
عمرو تعامل بسلطوية و لا بأفضلية بشهادة مواطنين تلاقاوه و لا تواصل معاهم لأنهم تظلموا و لا وقع ليهم شي مشكل !
شكون أنت أ زيان ؟
آش قدمتي للشعب من غير أنك استفدتي من الدولة و باقي كتعيش فالريع و الإمتيازات !!
غير ذاك النهار اكتشفنا أنك داير السطو على شقة ماشي فملكك ، مولاها مات و مشيتي فرعتي الباب و درتيها مكتب غير مصرح به مكتخلص فيه حتى ريال !
و المكتب ديالك كاريه من عند الأحباس ! واش ما عندك باش تاخذ بيرو بلا إمتيازات كيف سيادك و لالياتك ؟
ما تعرفش تعيش بحالك بحال الناس بلا أفضلية و بلا محاباة؟
يتحبس ولدك و من بعد ؟؟؟
ولدك أحسن من ولاد الناس اللي غلطو و تحاسبو؟
تدعيك إمرأة و هي موكلتك السابقة و من بعد ؟؟
أنت مقدس ؟ حتى واحد ما يتابعك ؟
تدعيك الداخلية و من بعد ؟
الداخلية دعات ناس أخرين من غيرك و تعاقبوا لأنهم خرقوا القانون ، و لجوء المؤسسات للقضاء ما فيه حتى شي عيب بل هو تكريس لدولة الحق و القانون !
صوراتك صاحبتك عريان و صيفطات الفيديو لشي حد و من بعد تحط فجريدة إلكترونية و من بعد ؟؟
شفنا هادشي فجرائد عالمية و تفجرات فضائح مدوية !!
ياك الصحافة الإستقصائية و هداكشي و كاينة حتى فالمريكان … أو لا !!
و من هادشي كامل .. شوف أ مولاي :
إلا كنتي كتظن أن الشعب كيحبك راك غالط !!
الشعب عارف مزيان شكون أنت و منين جيتي و على شنو كتقلب !!
و الناس عارفين أنك مسطي … و مكيديوش عليك !!
و كل واحد و بلاصتو أ الاستاذ !
و رحم الله من عرف قدر نفسه…
المقارنة ماشي فصالحك بتاتا!!
واحد السيد كيفكك الخلايا الإرهابية و واحد كيفكك فالصداف ديال سروالو !!
لا علاقة أ حنيني … لا علاقة بالكل !!
و ختاما … المومني ماشي هو بنبركة … و عمرو يكون بحالو !
و أنت عمرك ترجع رجل دولة …
أنت آخر ما تبقى من مخلفات سنوات الرصاص …
نهار يدي مول الأمانة أمانتو ما غادي يمشي فجنازتك لا رجال دولة و لا مسؤولين كبار ، و ما غادي تخرج فيك لا تعزية و لا برقية !!
و مصيرك …مقبرة النسيان.
